![GSH APP](https://gazetashqiptare.al/wp-content/uploads/2022/04/gshok.jpg)
![Download on Apple Store](https://balkanweb.com/wp-content/uploads/2019/01/ios.jpg)
![Get it on Google Play](https://gazetashqiptare.al/wp-content/uploads/2022/04/android-app.png)
Regjisori dhe njëherësh ish-Drejtori i Teatrit Eksperimental, Kastriot Çipi, ka reaguar një ditë pas rizgjedhjes së Hervin Çulit në krye të Teatrit Kombëtar.
Përmes një postimi në Facebook, Çipi ka publikuar raportin e Institutit të Ndërtimit, lidhur me gjendjen e godinës ekzistuese të Teatrit Kombëtar.
Dhe siç theksohet në raport, godina aktuale nuk rrezikon shembjen.
Për këtë arsye, Çipi thotë se Drejtori i saporizgjedhur i Teatrit, Ministrja e Kulturës Mirela Kumbaro dhe drejtoresha e IMK-së Arta Dollani duhet të vihen nën akuzë për shpërdorim detyre pasi sipas tij nuk kanë bërë asnjë investim për mirëmbajtjen e godinës.
Kjo lidhet me deklaratat e bëra nga Hervin Çuli dhe dy zyrtarët e lartpërmendur, që janë shprehur njëzëri se godina e Teatrit duhet të shembet, për t’i hapur rrugë projektit të qeverisë, projekt ky që kundërshtohet me forcë nga pjesa më e madhe e artistëve.
“Raporti i Institutit të Ndërtimit përgënjeshtron drejtorin e TK Hervin Culi, drejtoren e IMK Arta Dollani dhe ministren e Kultures Mirela Kumbaro! Në asnjë rresht nuk provohet rreziku i shembjes dhe zjarrit! Përkundrazi, raporti është akuzë për shpërdorim detyre nga këta zyrtarë publikë, që prej më shumë se katër vjetësh nuk kanë marrë asnjë masë për mirëmbajtjen e ndërtesës!” shkruan Çipi
Kujtojmë se një ditë më parë, me propozim të Ministrisë së Kulturës, qeveria rikonfirmoi Çulin si Drejtor të Teatrit Kombëtar.